စာကြည့်တိုက်ဖြစ်ပေါ်လာပုံ

သုတေသနစာကြည့်တိုက်သည် ရန်ကုန်မြို့၊ မရမ်းကုန်းမြို့နယ်၊ ကမ္ဘာအေးကုန်းမြေပေါ်ရှိ ဆဋ္ဌသင်္ဂါယနာတင် မဟာပါသာဏလိုဏ်ဂူကြီး၏မြောက်ဘက် ပိဋကတ်တိုက်အဆောက်အဦကြီး၏ ဘယ်ဘက်ခြမ်းတွင်ရှိပါသည်။

စာကြည့်တိုက်အမျိုးမျိုးရှိသည့်အနက် အခြားစာကြည့်တိုက်များနှင့်မတူဘဲ သုတေသနပြုစုလေ့လာ သူများအတွက် ဘာသာရေးနှင့်သက်ဆိုင်သည်များကို အထူးဦးစားပေးလေ့လာနိုင်သော (သုတေသန)အထူးစာကြည့်တိုက် ဖြစ်သည်။

ဤသုတေသနစာကြည့်တိုက်ကြီးသည် သာသနာရေးဝန်ကြီးဌာနနှင့် အခြားဝန်ကြီးဌာနမှ ဘာသာရေးဆိုင်ရာ သုတေသီများ၊ သမိုင်းသုတေသီများနှင့် လေ့လာသူများအတွက် လိုအပ်သော စာအုပ်စာတမ်းများနှင့် အထောက်အထားများ ရှာဖွေပေးနိုင်ရန်၊ နိုင်ငံတော်ပရိယတ္တိသာသနာ့တက္ကသိုလ်၊ အပြည်ပြည်ဆိုင်ရာထေရဝါဒဗုဒ္ဓသာသနာပြု တက္ကသိုလ်မှ ဗုဒ္ဓစာပေကို လေ့လာနေသော စာသင်စာချရဟန်းတော်များ၊ နိုင်ငံခြားသားရဟန်း/ သီလရှင်/လူပုဂ္ဂိုလ်များ ရန်ကုန်တက္ကသိုလ်နှင့် အခြားတက္ကသိုလ်များမှ အရှေ့တိုင်းပညာဘာသာရပ်၊ မြန်မာစာပေ၊ သမိုင်းစသော ဘာသာရပ်များကို အထူးလေ့လာသုတေသနပြုလိုကြသည့် ဘွဲ့လွန် ကျောင်းသား၊ ကျောင်းသူ၊ ဆရာ၊ ဆရာမများ၊ ကထိက၊ ပါမောက္ခများလာရောက် သုတေသန ပြုနိုင်ကြစေရန် သာသနာတော်ထွန်းကားပြန့်ပွားရေးဦးစီးဌာန၏ သမိုင်းပြုစုခြင်း၊ ကျမ်းပြုစုခြင်း၊ ဘာသာ ပြန်ခြင်း၊ စာစောင်ထုတ်ဝေခြင်းတို့တွင် အထောက်အထားရှာဖွေနိုင်စေရန် ရည်ရွယ်၍ ဤစာကြည့်တိုက်ကို တည်ထောင်ဖွင့်လှစ်ထားခြင်းဖြစ်ပါသည်။

ဘာသာကြီးလေးရပ်ဖြစ်သော ဗုဒ္ဓဘာသာ၊ ခရစ်ယာန်ဘာသာ၊ ဟိန္ဒူဘာသာ၊ အစ္စလာမ် ဘာသာအပြင် အခြားကိုးကွယ်မှုများနှင့် ရှေးကျသော အရှေ့တိုင်းပညာ၊ ဒဿနိကဗေဒ၊ မြန်မာ့ ယဉ်ကျေးမှု၊ မြန်မာစာ၊ သမိုင်းဆိုင်ရာစသည့် ရည်ညွှန်းစာအုပ်များကို ဘာသာရပ်အလိုက် စုဆောင်း ထားရှိပါသည်။

စာကြည့်တိုက်ရှိ စုဆောင်းထားသော စာအုပ်များ

  • မြန်မာဘာသာ - ၂၅၇၆၉ အုပ်
  • အင်္ဂလိပ်ဘာသာ - ၁၅၄၃၇ အုပ်
  • အခြားဘာသာ - ၂၂၈၆ အုပ်

ရှေးဟောင်းလက်ရေးစာမူများ

ယင်းသုတေသနစာကြည့်တိုက်တွင် စာအုပ်စာတမ်းများအပြင် ရှေးဟောင်း ပေ၊ ပုရပိုက်၊ ကမ္မဝါစာ၊ မင်ကူးကျောက်စာနှင့် စာချွန်တော်များ ထိန်းသိမ်းထားရှိပါသည်။ ပေစာများမှာ အနည်းဆုံး နှစ်(၁၀၀)ကျော် သက်တမ်းရှိပြီး ဝိသုဒ္ဓိမဂ်ကျမ်း(မြန်မာသက္ကရာဇ် ၁၀၂၇ ခုနှစ်)သည် နှစ်အရှည်ဆုံး ကျမ်းအဖြစ် မှတ်တမ်းတင်ထားရှိပါသည်။

စုဆောင်းထားသော လက်ရေးစာမူများ

  • ပေစာထုပ် - ၁၁၈၂၀ ထုပ်
  • ပုရပိုက် - ၁၂၄၄ ထုပ်
  • မင်ကူးကျောက်စာ - ၁၆၈ ခု
  • ကမ္မဝါစာ - ၁၁၁ ခု
  • စာချွန်တော် - ၁၉ ခု

စာကြည့်တိုက်နှင့် ပေစာဌာနတွင် စုဆောင်းထိန်းသိမ်းထားသော ပေစာထုပ်များကို ထိုင်းနိုင်ငံ ဓမ္မကာယဖောင်ဒေးရှင်းနှင့် ပူးပေါင်းပြီး ဒီဂျစ်တယ်ဓာတ်ပုံမူ(Digitization Project)ပြုလုပ် ဆောင်ရွက်လျက်ရှိရာ ၂၀၁၁ ခုနှစ်၊ စက်တင်ဘာလမှစ၍ ၂၀၁၅ ခုနှစ်၊ မတ်လအထိ ပေစာထုပ် (၁၇၀၆) ထုပ်၊ ကျမ်းခေါင်းစဉ်(၄၇၀၀)ကျမ်း၊ စာမျက်နှာပေါင်း(၈၄၈၄၃၂)မျက်နှာကို (Digitization) ပြောင်းလဲပြီးဖြစ်ပါသည်။

စာနယ်ဇင်းစုဆောင်းထားရှိမှု

မြန်မာ့အလင်း၊ ကြေးမုံ၊ New Light of Myanmar စသော သတင်းစာများ စုဆောင်း ထားရှိပါသည်။ ထို့အပြင် ဌာနထုတ်စာစောင်များဖြစ်သော သာထွန်းပြန့်ဓမ္မစာစောင်နှင့် သာသနာ့ ရောင်ခြည်စာစောင်များကိုလည်း စုဆောင်းထားရှိပါသည်။ မြန်မာတိုင်း(မ်)ဂျာနယ်(အင်္ဂလိပ်၊ မြန်မာ)၊ မြဝတီမဂ္ဂဇင်းနှင့် အင်္ဂလိပ်မဂ္ဂဇင်းများဖြစ်သော Time, Reader’s Digest, National Geographic မဂ္ဂဇင်းများကို ဝယ်ယူစုဆောင်းထားရှိပါသည်။