ပြည်ထောင်စုသမ္မတမြန်မာနိုင်ငံတော်

သာသနာရေးဝန်ကြီးဌာန

သာသနာတော်ထွန်းကားပြန့်ပွားရေးဦးစီးဌာနနှင့် မဟာဓမ္မပါလအသင်း၏ ကူညီလှူဒါန်းမှုဖြင့် e-library ဖွင့်ပွဲအခမ်းအနားတွင် သာသနာရေးဝန်ကြီးဌာန၊ ပြည်ထောင်စုဝန်ကြီး ဦးစိုးဝင်း၏ လျှောက်ထားလွှာ

[ ၁၃၇၇-ခုနှစ်၊ ဒုတိယဝါဆိုလဆန်း ၅ ရက် (၂၀၁၅ ခုနှစ်၊ ဇူလိုင်လ ၂၁ရက်) အင်္ဂါနေ့]

ရိုသေလေးမြတ်စွာ လျှောက်ထားအပ်ပါသည် ဆရာတော် သံဃာတော် အရှင်သူမြတ်တို့ဘုရား-

သာသနာရေးဝန်ကြီးဌာန၊ သာသနာတော်ထွန်းကားပြန့်ပွားရေးဦးစီးဌာန၊ ပြည်ပ သာသနာပြုဌာနခွဲ၊ ကမ္ဘာအေးသုတေသနစာကြည့်တိုက် e-library ဖွင့်ပွဲ အခမ်းအနားသို့ နိုင်ငံတော်သံဃမဟာနာယကအဖွဲ့ ဥက္ကဋ္ဌဆရာတော်ကြီး အမှူးပြုသော သံဃာတော် အရှင်သူမြတ်များ ကြွရောက်ချီးမြှောက်တော်မူကြသည်ကို ဖူးတွေ့ရပါသဖြင့် သမဏာနဉ္စ ဒဿန မင်္ဂလာတရား တိုးပွားရသည့်အပြင် ဂုဏ်ယူဝမ်းသာ ကြည်ညိုသဒ္ဓါပွားများ ရပါကြောင်း လျှောက်ထားအပ်ပါသည်ဘုရား။

ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်၊ ပုညနိမ္မိတာရုံ ရွှေသုဝဏ်ကျောင်းတိုက် ပဓာနနာယက၊ ဘဒ္ဒန္တသဒ္ဓိယ အရှင်မြတ်၏ ဦးဆောင်မှုဖြင့် သာသနာရေးဝန်ကြီးဌာနနှင့် မဟာဓမ္မပါလအသင်းဥက္ကဋ္ဌ ဦးမြင့်ဦး၊ ဒုတိယဥက္ကဋ္ဌ ဦးပြုံးမောင်မောင် အစရှိသော ကုသိုလ်ရှင်စေတနာရှင်များက မကြုံစဖူးထူးကဲလှသော ဤသာသနာပြု လုပ်ငန်းကြီးကို မဖြစ်မနေ သန္နိဋ္ဌာန်ဖြင့် နည်းပညာအကူအညီသာမက ခေတ်မီစက်ပစ္စည်းများ၊ ပညာဒါန လုပ်အားများကိုပါ ကာယအား ဉာဏအားပါဝင်၍ ပံ့ပိုးလှူဒါန်းကြသဖြင့် ပညာသံဝတ္တနိက ကုသိုလ်တော် အောင်ပွဲကြီးကို ဆောင်ရွက်နိုင်ခဲ့ပြီ ဖြစ်ပါသည်ဘုရား။

စေတနာသဒ္ဓါတရားထက်သန်စွာ ကူညီလှူဒါန်းခဲ့ကြသော အလှူရှင်များကိုလည်း အနာဂတ်သာသနာတော်အတွက် အားတက်ရွှင်လန်းသော စိတ်ထားဖြင့် ချီးကျူး ဂုဏ်ပြု သာဓုအကြိမ်ကြိမ် ခေါ်ဆိုပါကြောင်း ရိုသေစွာလျှောက်ထား အပ်ပါသည် ဘုရား။

ဆရာတော်သံဃာတော်အရှင်သူမြတ်တို့ဘုရား-

နိုင်ငံတော်မှ မူဝါဒချမှတ် ဆောင်ရွက်လျက်ရှိသော ဝန်ကြီးဌာနများ၏e-Government လုပ်ငန်းစဉ်များအရ သာသနာရေးဝန်ကြီးဌာန၏ e-Government လုပ်ငန်းစဉ်တစ်ခုအဖြစ် ကမ္ဘာအေးကုန်းမြေရှိ သုတေသနစာကြည့်တိုက်အား အများပြည်သူများ လွယ်လင့်တကူ Online ပေါ်တွင် လေ့လာဖတ်ရှုနိုင်ရန်အတွက် e-library အဖြစ် ဆောင်ရွက်ခဲ့ပါသည် ဘုရား။

ပြည်ထောင်စုသမ္မတမြန်မာနိုင်ငံတော်တွင် ရဟန်းသာမဏေ (၅၅၁၅၈၇) ပါး၊ သီလရှင် (၅၅၆၀၈) ပါး၊ စုစုပေါင်း (၆၀၇၁၉၅) ပါးရှိပြီး၊ ပရိယတ္တိစာသင်တိုက် (၁၂၃၈) တိုက်၊ ပဋိပတ္တိကမ္မဋ္ဌာန်းရိပ်သာ (၇၄၆) ကျောင်းရှိနေပြီး ထေရဝါဒဗုဒ္ဓ ဘာသာကို အများဆုံး ကိုးကွယ်သည့် နိုင်ငံတစ်နိုင်ငံဖြစ်သည့် အားလျော်စွာ မြန်မာနိုင်ငံသူ၊နိုင်ငံသားတို့ အနေဖြင့် သာသနာတော်မြတ်ကြီးကို ပစ္စည်းလေးပါးတို့ဖြင့် အလေးအနက်ထား ထောက်ပံ့လှူဒါန်းခွင့် ရရှိလျက်ရှိပါသည်ဘုရား။

မြတ်ဗုဒ္ဓ၏ အဆုံးအမ ဒေသနာတရားတော်တို့ကို မှတ်တမ်းအဖြစ် ထားရှိအပ်သော ပါဠိတော်၊ အဋ္ဌကထာ၊ ဋီကာ၊ ငါးရာ့ငါးဆယ်နိပါတ်တော် စသော ကျမ်းစာအုပ်တို့ အရှည်ခန့်၍ တည်တံ့စေရန်ဟူသော မွန်မြတ်သော ရည်ရွယ်ချက်ဖြင့် မဟာဓမ္မပါလအသင်းက ကူညီလှူဒါန်းခဲ့ရာ ယနေ့တွင် သာသနာတော်ထွန်းကားပြန့်ပွားရေးဦးစီးဌာနမှ Website တစ်ခုတည်ထောင် ဖွင့်လှစ်ဆောင်ရွက်နိုင်ခဲ့ခြင်းသည် မြန်မာနိုင်ငံ အတွက်သာမက ဗုဒ္ဓစာပေများကို လေ့လာမှတ်သား လိုက်နာလိုကြသည့် ပြည်ပ နိုင်ငံများရှိ ထေရဝါဒဗုဒ္ဓဘာသာဝင်များ အတွက်ပါ ထိရောက်သော အကျိုးတရားများ ဖြစ်ထွန်းလာလိမ့်မည်ဟု ယုံကြည်မိပါသည် ဘုရား။

ဆရာတော်သံဃာတော်အရှင်သူမြတ်တို့ဘုရား-

ဘုရားတပည့်တော်များ၏ ပြည်ထောင်စုသမ္မတမြန်မာနိုင်ငံတော်တွင် မြတ်စွာ ဘုရားရှင်၏ မူရင်းဒေသနာ ပါဠိတော်များကို ပဉ္စမသင်္ဂါယနာ၊ ဆဋ္ဌသင်္ဂါယနာဟူ၍ နှစ်ကြိမ်တိုင်တိုင် စိစစ်တည်းဖြတ် သုတ်သင်လျက် သင်္ဂါယနာတင်ပြီး ဖြစ်သည့် အတွက် အနက်အားဖြင့်ဖြစ်စေ၊ သဒ္ဒါအားဖြင့်ဖြစ်စေ အပိုအလိုမရှိ "ကေဝလ ပရိပုဏ္ဏံ" လုံးဝဥဿုံပြီးပြည့်စုံသည့် တရားဒေသနာတော်တို့ဖြစ်ကြောင်း လေ့လာ သိရှိရပါသည်ဘုရား။ ထို့ကြောင့် ထေရဝါဒဗုဒ္ဓသာသနာ၏ ဓမ္မအစစ်၊ ဓမ္မအမှန်ကို ပေးစွမ်းနိုင်သည့် ဘူမိနက်သန် ဧကန်မှန်သော နိုင်ငံတစ်နိုင်ငံ ဖြစ်သည့်အားလျော်စွာ နိုင်ငံတကာ၏ အသိအမှတ်ပြုမှုကိုလည်း ရရှိထားပါသည်ဘုရား။

ပုဂံခေတ်မှစတင်၍ ယနေ့ကာလတိုင်အောင် ဂန္ထဓုရ ပရိယတ္တိဝန်ဆောင် ဆရာတော်ကြီးများက မူရင်းပါဠိတော်များနှင့် အဋ္ဌကထာ၊ ဋီကာကျမ်းစာများ၏ အနှစ်သာရတို့ကို သာမန်ပုဂ္ဂိုလ်များ လွယ်ကူရှင်းလင်းစွာ နားလည်သိရှိအားထုတ်နိုင်အောင် ဘုရားရှင်၏ အလိုတော်နှင့် လျော်ညီစွာ မြန်မာစကားပြေ အရေးအသားဖြင့် ပြုစုထားသောကျမ်းများသာမက ပရိယတ္တိဂုဏ်ဆောင် သာသနာပြု ဥပါသကာကြီးများ၏ မြန်မာဘာသာဖြင့် ပြုစုထားသော ကျမ်းစာများကိုလည်း မြန်မာနိုင်ငံတွင် အများအပြား ရှိထားပြီး ဖြစ်ပါသည်ဘုရား။

ခေတ်အဆက်ဆက်က ပေါ်ထွန်းလာခဲ့သော ပဋိပတ္တိဝန်ဆောင် မဟာထေရ်ကြီးများ၏ ပရိယတ္တိနှင့် လျော်ညီသော ပဋိပတ္တိ ကမ္မဋ္ဌာန်းအားထုတ်နည်း အမျိုးမျိုးတို့သည်လည်း ပေါ်ထွန်းနေပြီဖြစ်ပါသည်ဘုရား။ ထို့အပြင် မြတ်ဗုဒ္ဓ၏ အတွေးအမြင်နှင့် ကျင့်စဉ်အဖြာဖြာတို့ကို ရှာမှီးနေကြသော နိုင်ငံတကာမှ သုတေသီများ၊ ဗုဒ္ဓဘာသာဝင် ရဟန်းရှင်လူပုဂ္ဂိုလ်များအတွက်လည်း ပိဋကတ် ဘာသာပြန်အဖွဲ့က ပြန်ဆိုတည်းဖြတ်ပြီးဖြစ်သော ပါဠိတော်-အင်္ဂလိပ် ဘာသာပြန်ကျမ်းများ၊ ဗုဒ္ဓဘာသာဆိုင်ရာ အင်္ဂလိပ်ဘာသာဖြင့် ရေးသားပြုစုထားသော အထွေထွေကျမ်းစာများကိုလည်း မြန်မာနိုင်ငံ အနေဖြင့် ကမ္ဘာတစ်ဝန်းသို့ ယနေ့မှစ၍ ဖြန့်ဝေနိုင်ပြီဖြစ်ပါသည်ဘုရား။

ဆရာတော်သံဃာတော်အရှင်သူမြတ်တို့ဘုရား-

“သဗ္ဗဒါနံ ဓမ္မဒါနံ ဇိနာတိ- အလှူဒါနအားလုံးတို့တွင် တရားတည်း ဟူသော အလှူကသာလွန်၏” ဟူသော ဘုရားရှင်၏ ဒေသနာတော်နှင့်အညီ “အမွန်မြတ်ဆုံး ဓမ္မဒါန” အဖြစ်ခံယူကာ ဗုဒ္ဓဘာသာ မြန်မာလူမျိုးများသည် ပရိယတ္တိစာသင်တိုက်များသို့ ပိဋကတ်ကျမ်းစာတို့ကို လှူဒါန်းလေ့ရှိကြပါသည်ဘုရား။ ပိဋကတ်ကျမ်းစာအုပ်များကို လှူဒါန်းခြင်းသည် အလှူခံရရှိသော သံဃာတော်နှင့် ထိုသံဃာတော် သီတင်းသုံးရာကျောင်းရှိ သံဃာများသာ ပိဋကတ်ကျမ်းစာများကို ဖတ်ရှုအသုံးပြုနိုင်သဖြင့် ကျောင်းတိုက်သံဃာအနည်းစုသာ သုတမယပညာနှင့် စိန္တာမယပညာတို့ကို တိုးပွားစေနိုင်မည် ဖြစ်ပါသည်ဘုရား။

ယနေ့ကျင်းပပြုလုပ်အပ်သော e-library ဖွင့်ပွဲလုပ်ငန်းစဉ်ကြီးသည် ကမ္ဘာတစ်ဝန်းလုံးရှိ ရဟန်းသံဃာတော်များ၊ ဗုဒ္ဓဘာသာဝင်များ၊ သုတေသီများအားလုံး ကမ္ဘာအရပ်ရပ်တွင် ရောက်ရှိရာ နေရာမှ ဖတ်ရှုလေ့လာကြမည်ဖြစ်ပါသည်ဘုရား။ ထိုသို့ဖတ်ရှုလေ့လာနိုင်ခြင်းဖြင့် ရရှိအပ်သော သုတမယပညာ၊ ကြံစည်တွေးတော ဆင်ခြင်ခြင်းဖြင့် ရအပ်သော စိန္တာမယပညာတို့ တိုးပွားရာမှတစ်ဆင့်တက်၍ လိုက်နာ ကျင့်သုံး ပွားများခြင်းဖြင့် ရအပ်သော ဘာဝနာမယပညာအထိ ဆည်းပူးရရှိနိုင်ကြ သဖြင့် “စကြာဝဠာအနှံ့ ကျယ်ပြန့်မွန်မြတ်လှသော ဓမ္မဒါနကုသိုလ်ထူးကြီး” ဟုပင် မှတ်တမ်းတင် ဂုဏ်ပြုရမည် ဖြစ်ပါသည်ဘုရား။

မဟာဓမ္မပါလအသင်းမှ ကွန်ပျူတာကျွမ်းကျင်သူ ဝန်ထမ်း (၁၀) ဦးသည် သာသနာရေးဝန်ကြီးဌာနမှ ဝန်ထမ်းများနှင့် ပူးပေါင်းကာ ၎င်းတို့ လှူဒါန်းသော Book Drive Pro စက်ဖြင့် ၁၆.၁၀.၂၀၁၄ ရက်နေ့မှ စ၍ Scan ဖတ်ခြင်းလုပ်ငန်းကို နေ့စဉ်ဆောင်ရွက်ခဲ့ရာ ယနေ့အထိ ဆဋ္ဌသင်္ဂါယနာမူ ပိဋကသုံးပုံ ပါဠိတော် (၄၀)အုပ်၊ အဋ္ဌကထာ (၅၁) အုပ်၊ ဋီကာ (၂၆) အုပ်၊ နိဿယ (၈) အုပ်၊ မြန်မာပြန် (၃၁) အုပ်၊ ပိဋကသုံးပုံ အင်္ဂလိပ်ဘာသာပြန် (၂၂) အုပ်၊ တိပိဋကပါဠိ-မြန်မာ အဘိဓာန် (၂၃) အုပ် အပါအဝင် မဟာဗုဒ္ဓဝင်ကျမ်းများ၊ သာသနာဝင်ကျမ်းများ၊ ဓမ္မပဒဝတ္ထုတော်များ၊ ငါးရာ့ငါးဆယ် ဇာတ်နိပါတ်တော်များ၊ ဆဋ္ဌသင်္ဂါယနာ စိစစ်ခဏ်း၊ ဆဋ္ဌသင်္ဂါယနာ အမေးအဖြေ စာအုပ်များ၊ ဗုဒ္ဓစာပန်းချီ၊ ဗုဒ္ဓဘာသာကောင်းတစ်ယောက်၊ ယဉ်ကျေးလိမ္မာမျိုးဆက်သစ် ရတနာ (အခြေခံအဆင့်)၊ ဘုရားသမိုင်းများ၊ ဝတ်ရွတ်စဉ်များ စသည့် တန်ဖိုးမဖြတ် နိုင်သော ဗုဒ္ဓစာပေမျိုးစုံ စာအုပ်များကို e-book အဖြစ် ပြောင်းလဲခဲ့ရာ စာအုပ်ပေါင်း အုပ်ရေ (၁၀၀၀) ကျော် ၊ စာမျက်နှာပေါင်း (၃၈၀၀၀၀) ကျော် ပြီးစီးခဲ့ပါသည်ဘုရား။

ဆက်လက်၍လည်း အပြည်ပြည်ဆိုင်ရာထေရဝါဒဗုဒ္ဓသာသနာပြုတက္ကသိုလ်နှင့် နိုင်ငံတော်ပရိယတ္တိသာသနာ့တက္ကသိုလ် (ရန်ကုန်၊ မန္တလေး) စာကြည့်တိုက်များရှိ တန်ဖိုးမဖြတ်နိုင်သော မြန်မာ-အင်္ဂလိပ် စာအုပ်များကိုလည်း e-book အဖြစ် ပြုစုခြင်း၊ ပြည်ထောင်စုသမ္မတမြန်မာနိုင်ငံတော်အတွင်းရှိ ထင်ရှားကျော်ကြားသော တရားဟောဓမ္မကထိက ဆရာတော်ကြီးများ၏ ရုပ်သံဖိုင် တရားတော်များကိုလည်း ယခု Website မှ ထုတ်လွှင့်သွားနိုင်ရေး ဆက်လက်ဆောင်ရွက်သွားမည်ဖြစ်ပါသည်ဘုရား။

ယခုအခါ ကမ္ဘာအေး ဗုဒ္ဓသုတေသနစာကြည့်တိုက်တွင် စနစ်တကျထိန်းသိမ်းထားသော ဗုဒ္ဓစာပေမျိုးစုံကို ကြည့်ရှုလေ့လာနိုင်ရန် ဌာန၏ Website ဖြစ်သော www.KBRL.gov.mm ဖြင့်ယနေ့မှစတင် ထုတ်လွှင့်တော့မည်ဖြစ်ရာ ပြည်ထောင်စုသမ္မတမြန်မာနိုင်ငံတော် အတွင်းရှိ ရဟန်းရှင်လူပြည်သူအားလုံး Online မှ တစ်ဆင့် ဖတ်ရှုလေ့လာနိုင်ကြမည်ဖြစ်သကဲ့သို့ ကမ္ဘာ့နိုင်ငံအသီးသီးမှ ဗုဒ္ဓဘာသာဝင် ရဟန်းရှင်လူ ပုဂ္ဂိုလ်များ ဗုဒ္ဓစာပေကို လေ့လာလိုသူ သုတေသီများ အနေဖြင့်လည်း လွယ်ကူ လျင်မြန်စွာ လေ့လာဖတ်ရှုနိုင်ပြီး လိုအပ်သော ကျမ်းစာများကို Download ရယူ နိုင်တော့မည် ဖြစ်ပါသည်ဘုရား။

ထို့ပြင် e-book အဖြစ် ပြောင်းလဲထားရှိသော စာဖိုင်များသည် စဉ်ဆက်မပြတ် ထိန်းသိမ်းဆောင်ရွက်ရမည့် လုပ်ငန်းစဉ်များဖြစ်သည့် အားလျော်စွာ သာသနာတော် ထွန်းကားပြန့်ပွားရေးဦးစီးဌာန၏ ကိုယ်ပိုင် Server တွင် e-book data များကို ထိန်းသိမ်းထားရှိ ဆောင်ရွက်လျက်ရှိသည့်အပြင် ရဟန်းရှင်လူ ပြည်သူအားလုံး ဤစာကြည့်တိုက်သို့ လာရောက်၍ လွယ်လင့်တကူ ကိုယ်တိုင်ဖတ်ရှုကာလေ့လာနိုင်ရန် အတွက် ကွန်ပျူတာအလုံး (၂၀) ကိုလည်း ဖြည့်တင်းထားပြီး ဖြစ်ပါသည်ဘုရား။

ယခုအခမ်းအနားသို့ တက်ရောက်လာကြသည့် ဆရာတော်ကြီးများကိုလည်း မဟာဓမ္မပါလအသင်းနှင့် ဦးပြုံးမောင်မောင် မိသားစုတို့မှ ဆဋ္ဌမူပိဋကသုံးပုံ ပါဠိတော်၊ အဋ္ဌကထာ၊ ဋီကာ၊ နိဿယ၊ မြန်မာပြန်၊ တိပိဋက ပါဠိ-မြန်မာ အဘိဓာန် တို့ထည့်သွင်းထားသော e-tablet အလုံး ၂၀၀ ကိုလည်း လှူဒါန်းသွားမည် ဖြစ်ပါသည်ဘုရား။

ဆရာတော်သံဃာတော်အရှင်သူမြတ်တို့ဘုရား-

နိဂုံးချုပ်အားဖြင့် လျှောက်ထားရပါလျှင်“ မြတ်ဗုဒ္ဓ၏အဆုံးအမ ဒေသနာတရား တို့ကို အနှစ်ချုပ်ပါက သီလ၊ သမာဓိနှင့် ပညာ” ဟူ၍ သုံးမျိုးသာရှိကြောင်း၊ ပညာ၏ အနိမ့်ဆုံးအဆင့်သည် ကောင်းမှု၊ မကောင်းမှုကို ခွဲခြား၍ သိခြင်းဖြစ်ပြီး အမြင့်ဆုံးအဆင့်မှာ သစ္စာလေးပါး တရားတို့ကို ထိုးထွင်းသိမြင်ခြင်းဖြစ်ကြောင်း၊ ထိုပညာသည်လည်း “သီလ ပညာဏတော ဇယံ- ကိုယ်ကျင့်သီလ အခြေခံသော ပညာ အရည်အသွေးသည် စစ်မှန်သော အောင်မြင်မှုကို ရရှိစေနိုင်သည်” ဟုဆိုသည့် အတိုင်း ဘုရားတပည့်တော်တို့ သာသနာရေးဝန်ကြီးဌာနက ယနေ့ဖွင့်လှစ် လိုက်သော Website (www.KBRL.gov.mm) မှတစ်ဆင့် “ ပရိယတ္တိ လေ့လာမှုမှသည် ပဋိပတ္တိ ကျင့်စဉ်သို့၊ ပဋိပတ္တိ ကျင့်စဉ်မှသည် ပဋိဝေဓအသိသို့” ဆိုက်ရောက်ပြီး လောကလူသားအားလုံးတို့၏ အန္တိမပန်းတိုင်ဖြစ်သော နိဗ္ဗာန်ချမ်းသာကို မျက်မှောက် ပြုနိုင်ကြပါစေကြောင်း မွန်မြတ်သော ပတ္ထနာအာသီသဖြင့် ဆန္ဒပြုရင်း နိဂုံးချုပ် အပ်ပါသည် ဆရာတော် သံဃာတော် အရှင်သူမြတ်တို့ဘုရား။

ဖွင့်ပွဲ ဗီဒီယိုမှတ်တမ်း

ဖွင့်ပွဲ ဓါတ်ပုံမှတ်တမ်း